【星寵專訪系列 另類愛狗人-楊潮凱】童年最佳玩伴

【星寵專訪系列 另類愛狗人-楊潮凱】童年最佳玩伴

SHARE

螢幕快照 2017-04-03 下午05.21.19

相信喜歡看劇集的人都不會對楊潮凱感到陌生, 但你也許不知道,沒有養狗的他其實是位愛狗之人,而且對哥基特別情有獨鍾。雖然養過不少寵物,但不養狗的決定原來是出於一個負責任的考慮。

童年最佳玩伴

潮凱向來喜歡動物,兒時家中總有許多玩伴,金魚黑摩利、巴西龜、甚至田雞都是他的至愛,「細個果陣最鍾意同哥哥上山捉田雞仔,記得我地第一次成功捉咗隻番屋企,諗住養佢嘅時候先發覺屋企冇籠。跟住唯有拎一餅餅錄影帶圍成高牆,仲特登留空頂部等佢有啲清新空氣,點知第二朝起身, 佢已經跳咗唔知去邊!」雖然「蝦碌」了無數次,但同時也令潮凱眼界大開,「唔養過黑摩利唔會知,原來佢地會食自己啲仔女。試過廿幾條魚毛啱啱出世,但魚媽媽即刻食咗十幾條,仲要唔𦧲骨,果次真喺嚇死!」

螢幕快照 2017-04-03 下午05.22.38

愛龜離世 深刻的教訓

但數到最難忘的一次經歷,大概是他第一隻巴西龜。有天放學,姨丈從河邊撈起了一頭巴西龜,將牠交託給潮凱照顧。潮凱雖然愛龜,卻因欠缺經驗不擅照顧,過了不久巴西龜便沉睡不起。他坦言自己非常內疚, 遂與哥哥用紙皮製作成一個迷你棺木,找一片林蔭將牠埋葬,又用泥土輕輕蓋著。「果次經驗令我意識到,所有動物都有生命,即使係一條小生命都應該要尊重。如果你冇心去養,根本喺一種作孽,只會害死隻動物。」那次之後,潮凱一直提醒自己要做盡責的主人,也正因如此,往後養了許多隻巴西龜都健康長壽。

螢幕快照 2017-04-03 下午05.23.24

與短腿狗首次邂逅

除了小動物,潮凱與狗的牽絆亦始於童年,與汪星人的初次接觸仍然記憶猶新。「細個住公屋,有次發現鄰居偷偷地養咗隻短腳狗,果陣我仲未識分係咩品種,只記得佢個樣勁可愛。我仲同佢拋下波,佢又識執番嚟俾我,真喺好過癮。果時我就開始諗,如果我都有一隻狗就好喇!」直到長大成人後,潮凱在電視上看到英女王拖著幾隻相同樣子的狗,才驟然洞悉當年那頭「短腳狗」原來是哥基。他還說這次拍攝的狗Model占占讓他想起了許多美好回憶,忍不住想抱牠回家。

不過,礙於近年拍攝工作繁重,潮凱稱自己無暇再照顧、打理,為免重蹈覆徹,現時已再沒有養任何新的寵物,儘管心裡其實很想養狗,「可能都係等到退休先養,因為一旦決定要養,我一定會用全部時間、心機去照顧佢。如果冇乜時間陪到佢嘅話,我寧願選擇唔養住。」

 

狗隻提供╱Kapokku Petto Shoppu Limited 

LEAVE A REPLY